புதிய கோள் கண்டுபிடிப்பு

நமது சூரிய குடும்பம் போலவே, இரவு வானில் தெரியும் விண்மீன்களுக்கும் குடும்பம் உண்டு; அதனைச் சுற்றும் கோள் களும் உண்டு. நம் சூரியனைவிட சிறிய, சிவப்பு குள்ள விண்மீன் ஒன்றை 2005ம் ஆண்டு ஆகஸ்ட் மாதத்தில் கண்டுபிடித்தனர். சுமார் 20.3 ஒளியாண்டுகள் தொலைவில் உள்ள அதற்கு கிளிஸ் 581 என பெயர் வைத்தனர். அப்போது கிளிசை சுற்றும் கோளையும் கண்டனர். இவற்றிற்கு கிளிஸ் 581பி என பெயர் சூட்டினர் . அந்த கிளிஸ் 581பி. நமது பூமியைப் போல், 10 மடங்கு நிறை கொண்டது; அதாவது, நம் சூரிய மண்டலத்தில் உள்ள நெப்டியூனின் அளவு இருக்கும். இந்த கோள், அந்த சிவப்பு குள்ள விண்மீனை 5.4 நாட்களில் சுற்றி விடுகிறது. அந்த சிவப்பு குள்ள விண்மீன், விண்வெளியில் உள்ள துலா ராசி விண்மீன் படலத்தில் உள்ளது.

சூரியன் நமது பால்வழி மண்டலத்திலுள்ள, ஓரியன் கைகளுக்குள் உள்ளது. சூரியனின் நிறையில் மூன்றில் ஒரு பங்கு அள வுள்ள கிளிஸ் 581, சூரியனுக்கு அருகிலுள்ள விண்மீன்களில், 87வது இடத்தில் உள்ளது. இதன் மையத்தில், ஹைடிரஜன் மிகக் குறைந்த வேகத்திலேயே எரிகிறது. இந்த விண்மீன் நம் சூரியனின் பிரகாசத்தோடு ஒப்பிடும் போது 0.2%அளவிற்கு பிரகாசிக்கும். அதன் மேல் பகுதி வெப்பம் 2,926.85 சென்டிகிரேடாகவும்/ 5,300.33 பாரன்ஹீட்டாகவும் உள்ளது. நமது சூரியனின் மேற்பரப்பு வெப்பம், 5,505சென்டிகிரேடாகவும்/9,941பாரன்ஹீட்டாகவும் உள்ளது.

கிளிஸ் 581ன் மற்றொரு கோளை 2007 ஏப்ரல் மாதத்தில் கண்டுபிடித்தனர். அதற்கு கிளிஸ் 581சி என பெயர் சூட்டப்பட்டது. இதுவரை கண்டுபிடிக்கப்பட்ட வெளிக் கோள்களில் இதுதான் மிகக் குறைந்த நிறை உடையது என அப்போது கருதப்பட்டது. மேலும், இது நம் பூமி போன்றே வாழிட சூழல் உள்ளதாகவும் கூறப்பட்டது. ஆனாலும், இதன் மேற்பரப்பு வெள்ளியின் தன்மை கொண்டது என கருதப்பட்டதால், இங்கு உயிர் வாழும் சூழல் இல்லை. இதன் மேற்பரப்பு வெப்பம் _3சென்டிகிரேட் முதல் _40 சென்டிகிரேட் உரை உள்ளது. இது 13 நாட்களில் அதன் சூரியனை சுற்றுகிறது.

இதே காலகட்டத்தில், கிளிஸ் 581_ன் அடுத்த கோளும் கண்டறியப்பட்டது. அதற்கு கிளிஸ் 581டி என பெயரிடப்பட்டது. இது நம் பூமியைப் பூமியைப் போல 7 மடங்கு பெரியது. நமது யுரேனசின் அளவு இருக்கும். இது கிளிஸ் 581ஐ 66.8 நாட்களில் சுற்றுகிறது. இந்த கிளிஸ் 581டி_யில் கூட உயிர்கள் வசிக்கும் சூழல் உள்ளதாக சொல்லப்பட்டது.

அதன்பின், கிளிசின் அடுத்த கோள், 2009 ஏப்ரல் 21அன்று கண்டுபிடித்ததாக அறிவிக்கப்பட்டது. இதுவே, மிகக் குறைந்த நிறையுள்ள வெளிக்கோள். இது பூமியை போல் 1.9 மடங்கு நிறை கொண்டது. ஆனால், கிளிஸ் 581ஐ 3.4 நாட்களில் சுற்றிவிடுகிறது.

கிளிஸ் 581ன் அடுத்த கோள் 2010 செப்டம்பர் 29ல் கண்டுபிடிக்கப்பட்டது. இதனை, ஹவாய் தீவிலுள்ள வானோக்கு நிலையம் கண்டுபிடிக்கப்பட்டது. இந்த வானோக்கு நிலையம் ஓர் இறந்த எரிமலையான மௌனா கியா மேல் அமைந்துள்ளது. இங்குள்ள தொலைநோக்கி ஆடியின் விட்டம் 10 மீ. உலகின் இரண்டாவது மிகப்பெரிய தொலை நோக்கி இது. இந்த கோளுக்கு, கிளிஸ் 581ஜி என பெயரிடப்பட்டது. இதனை,வானவியல் பேராசிரியர்,ஸ்டீவன் வோக்ட், கலிபோர்னியா பல்கலைக் கழக சாண்டா க்ருஸ், வாஷிங்டன் கார்னேஜி நிறுவனத்தைச் சேர்ந்த பால் புட்லரும் இணைந்த குழு கண்டுபிடித்தது.

இது தன் சூரியனான கிளிஸ் 581ஐ, 37 நாட்களில் சுற்றுகிறது. அதன் தாய் விண்மீனிலிருந்து 0.146 வானியல் அலகு தொலைவில் உள்ளது. இது நம் பூமி போல் 3.1 முதல் 4.3 மடங்கு நிறையும், 1.3 முதல் 2 மடங்கு ஆரமும் உள்ளதாக தெரிகிறது.

மேலும், இந்த கோள் பூமி போல் 1.3 முதல் 1.5 மடங்கு கற்பாறைகளாலும், 1.7 முதல் 2 மடங்கு வரை நீரினாலும் ஆனது என கருதப்படுகிறது. இதன் மேற்பரப்பு ஈர்ப்பு விசை, பூமியைப் போல் 1.1 முதல் 1.7 மடங்கு உள்ளதாக இருக்கும் என எதிர்பார்க்கப்படுகிறது. இங்கு உயிரினம் வாழும் சூழல் உள்ளதாவும் கருதப்படுகிறது.

கிளிஸ் 581 ன் , 581ஜி கோளில் நிச்சயம் 100% உயிரினம் இருக்கும் என ஸ்டீவன் வோக்ட் உறுதியாக கூறுகிறார். ஆனால் அது மற்றவர்கள் சொல்வதுபோல, வேற்றுகிரக வாசியாக இருக்க வேண்டியதில்லை. அவை பாக்டீரியா, அதற்கு இணையான பாசி வகையாகக் கூட இருக்கலாம். இதுதான் பூமியின் தனித்துவம் என கருத்து தெரிவித்துள்ளார் ஸ்டீவன் வோக்ட். எதிர்காலத்தில் நாம் இந்த கோளுக்கு சென்று பார்க்கலாம்.

நன்றி: பேரா.சோ.மோகனா